Forenadoa e ferata del Renon
No dalonc da la stazion de la corieres, te Via Renon 12, l é la stazion de la forenadoa del Renon. Duc i dis, ogne cater menuc na cabina ponta via da Busan e la rua su fin ai 1227 metres de Soprabolzano/Oberbozen. L viac de 12 menuc su per l col ne sporc na veduda su la zità de Busan e su la crepes de Sciliar e Ciadenac. La cabines de la forenadoa les é n muie lèries per poder montèr ite ence con rodes e bagherles.
Canche se rua su a Soprabolzano/Oberbozen, se pel seghitèr subito l viac co la ferata del Renon, la ultima ferata del Sudtirol a “scartamento ridotto” che ponta demez apontin da la stazion sunsom de la forenadoa. La linea de la ferata la é stata fata su endèna la Belle Époque e del 1907 la pontèa via adertura da piaz Walter, colean coscita Busan e l Renon.
