l bosch del Latemar
L bosch del Latemar, cognosciù ence desche bosch de Ciareja, l cour la pèrt a nord del grop di monc omonims, da la sia, fin al Pas de Costalongia, a na auteza anter i 1.300 e i 2.100 metres. I bosć cresc maormenter su la pèrts che dèsc a N-NE e NO; la zones più basses les è pianejines, enveze chela più autes les è belebon ertes e segnèdes da toèi, da roes e sciti da levines.
L bosch de Ciareja se slèria fora japede l grop del Latemar.
Dal 2009 l Latemar l é un di gropes di monc de la Dolomites che – ensema al Parch Naturèl Sciliar-Ciadenac – l é doventà patrimonie mondièl de l’umanità. Fèsc imprescion pissèr che acà 240 milions de egn chiò l era na isola encercenèda da n mèr tropical. Aldidanché i monc imponenc del Latemar se auza anter la val de Fiem, la val de Fascia e la Val d’Ega, tel Trentin e tel Sudtirol, olache l pas de Ciareja l les separa dal Ciadenac.
Tel cher del bosch del Latemar l é l lech de Ciareja cognosciù ence desche “Lech del ercaboan” per i beliscimes colores da la mile sfumadures. E belapontin l ercaboan l é l protagonist de na contia: anter na vivèna encantadora e n strion enamorà, na contia che ge dona a chest melaur naturèl n’aura de magia.
https://eggental.com/it/dolomiti-natura/lago-di-carezza
photo © Harald Wisthaler
