L museo geologich de Pardac
Che jir a fèr a Pardac? No pel mencèr na vijita al Museo Geologich de la Dolomites, te piaza SS.Filip e Giacum, per n viac anter passà, prejent e davegnir de la Dolomites.
L Museo Geologich de la Dolomites de Pardac, senta teritorièla del MUSE – museo de la scienzes de Trent, l é spezialisà te la geologia di crepes anter i più bie al mond, recognosciui Patrimonie UNESCO. L museo nasc del 1899, de gra a la glissa culturèla envièda via da na descorida geologica ecezionèla che, al scomenz del Otcent, à chiamà te Pardac geologhes e scienzié da duta l’Europa.
L percors espositif ne conta la storia geologica de la Dolomites, mascimamenter de la valèdes de Fiem e de Fascia, e la longia evoluzion del paesaje. La colezion scientifiches del museo, con ejemplères de fossii, de minerèi e de crepa, l é na testimonianza preziousa de la rica geodesvalivanza del teritorie.
L’istà geologich a Pardac
Endèna la sajon da d’istà l museo geologich endreza ativitèdes, laboratories interatives, vijites vidèdes e evenc spezièi leé al teritorie e a la geologia; de messèl, en ocajion del An Internazionèl per la Conservazion di Giacees metù a jir dal ONU, l met fora la instalazion multimedièla “N son che mor fora” che l ne mena tel cher de n giacé e l ne fèsc sentir i sons de la fujion, per pissèr sora la implicazions del mudament climatich.
Al museo de Pardac la geologia la é ence digitèla, de gra a “GEOdi” con visores per la realtà virtuèla che ne dèsc l met de viver na esperienza piena anter minerèi, sasc, minieres e scenaries da no se spetèr de la Dolomites e del Trentin
La Dolomites no l é demò monc da veder, ma ence da audir; tel podcast GEOdi, se pel scutèr 10 stories che ne conta la tapes maores de la evoluzion de la Dolomites e di crepes del Trentin.
Itineraries:
DOLOMITES WORLD HERITAGE GEOTRAIL
photo © Archivio MUSE – Museo delle Scienze, fotografo Michele Purin
